Krejt-kah-pak

Protestë në Mitrovicë kundër dhunës seksuale

Sot media të ndryshme raportuan se dy burra kanë përdhunuar një vajzë të mitur në Mitrovicë.

Aktivistët nga Mitrovica kanë raportuar se do të fillojnë protesta nën slloganin “Thuani emrat e përdhunuesve dhe ngacmuesve seksualë.

Protesta do të fillojë nga ora 12:00 të shtunën tek sheshi “Isa Boletini” në Mitrovicë.

Lexoni deklaratën e plotë të organizatorëve:

“Sot u raportua se dy burra kanë përdhunuar një vajzë të mitur në Mitrovicë.

Ky rast veç sa është duke e treguar natyrën epidemike të përdhunimeve e abuzimeve ndaj vajzave e grave, për çka ne do të kundërshtojmë. Kjo është duke dhënë alarm mbi rrezikun dhe ankthin e vazhdueshëm në të cilin rriten dhe jetojnë vajzat dhe gratë në Kosovë. Burrat po vazhdojnë t’i dhunojnë dhe ngacmojnë vajzat kudo, duke na treguar fare mirë se për vajzat e gratë asnjë vend nuk është i sigurtë.

Në gjithë këtë situatë, institucionet private e publike, thellësisht patriarkale, janë bashkëfajtore. Praktika e amnistimit të ngacmuesve dhe përdhunuesve duhet të ndalet dhe emrat e përdhunuesve e ngacmuesve duhet të thuhen nga policia. Ne kemi të drejtë të dijmë kush janë përdhunuesit.

Rastet e përdhunimit e ngacmimit seksual të vajzave dhe grave në çdo hapësirë janë rrezik për shoqërinë tonë dhe sigurinë publike.

Andaj, të shtunën, duke filluar nga ora 12:00 ne mblidhemi në sheshin “Isa Boletini” në Mitrovicë për ta kundërshtuar dhe dërguar mesazhe revolte kundrejt shtypjes tonë e abuzimit të trupave tanë.

Protestueset/it duhet t’i respektojnë udhëzimet e IKShPK-së dhe Ministrisë së Shëndetësisë për frenimin e përhapjes së COVID – 19 duke u pajisur me maska dhe mbajtur distancimin fizik.”

Linku i eventit: https://www.facebook.com/events/444246456924788/?ti=ls