Krejt-kah-pak

Protestë nesër nga Kolektivi Feminist për sigurinë e vajzave në shkolla

Kolektivi Feminist ka paralajmëruar protestë nesër në lidhje me rastin e ngacmimit seksual ndaj vajzës shtatë vjeçare në shkollën “Faik Konica” dhe sigurisë së përgjithshme të vajzave në shkolla.

Lexoni deklaratën e tyre të plotë:

Dje, në shkollën “Faik Konica” u bë publik rasti i një sulmi seksual ndaj një nxënëse në klasën e parë nga tre nxënës të klasës së shtatë. Ky rast, i cili nuk mund të lexohet si rast i izoluar, është duke e shpërfaqur edhe një herë, në mënyrë të frikshme realitetin e vajzave.


Vajzat janë duke u ballafaquar me dhunë e abuzim seksual në shkolla, pikërisht për shkak të dështimit shoqëror e institucional për ta trajtuar dhunën ndaj vajzave e grave si problem serioz dhe shqetësim për sigurinë publike.

Andaj, nesër, në ora 12:00, mblidhemi pranë Ministrisë së Arsimit, Shkencës, Teknologjisë dhe Inovacionit, për të protestuar kundrejt neglizhimit të sigurisë së vajzave dhe mungesën e politikave të mirëfillta të edukimit, të cilat janë duke e mirëmbajtur patriarkalitetin i cili po rezulton të jetë i dhunshëm për vajzat brenda dhe jashtë institucioneve shkollore.

Protesta do t’i ketë tri kërkesa kryesore:

1. Futja e edukatës seksuale në shkolla;

2. Ambiente të sigurta për nxënëset/it;

3. Punësimi i punëtoreve/ëve socialë dhe psikologeve/ëve në të gjitha shkollat.

Protestueset/it duhet t’i respektojnë udhëzimet e IKShPK-së dhe Ministrisë së Shëndetësisë për frenimin e përhapjes së COVID – 19 duke u pajisur me maska dhe mbajtur distancimin fizik.

About the author

Grazeta

Grazeta

Add Comment

Click here to post a comment